MIZENGO PINDA KUMWINGIZA RAIS KIKWETE KWENYE HISTORIA

      USHAURI alioutoa Mhe Mizengo Kayanza Pinda katika semina ya kujadili na kupitisha kanuni zitakazotumika kujadili na kupitisha ibara na vifungu vyake vya rasmu ya katiba.  Ushauri ambao ulijaa busara ndani yake, kama kamati ya kanuni na wajumbe wa bunge hili watazingatia utamwingiza Rais Kikwete kwenye historia.

    Nasema hivi kwa sababu mambo yanye mabishano/mvutano mkubwa kama hayataamuliwa kwa busara ha hekima watanzania hatutapata katiba tuitakayo na baadaye hatutapata Tanzania tuitakayo na kumfanya si tu Rais Kikwete asiingie kwenye historia bali pia hata bunge lenyewe litaingia katika historia mbaya.

            Mhe Mizengo Kayanza Pinda ametoa ushauri kuwa mambo ambayo yatakuwa na mabishano/mvutano mkubwa yasiamuliwe na kura ya ²/₃ ya wajumbe wa bunge maalumu la katiba, badala yake yaundiwe jopo (roundtable) la watu wenye mapenzi mema na uzalendo kwa nchi si tu  kuamua bali pia kupitisha mambo yenye manufaa kwa watanzania wote bila kujali itikadi zao, makundi yao, jumuiya zao wanazowakilisha.

       Waziri mkuu Mizengo Pinda si tu ameachukua ushauri wangu kwa wajumbe wa bunge maalumu la katiba nilioutoa katika makala zangu mbili katika Gazeti hili makini tole Na. 3372 la 26/02/2014 yenye kichwa cha habari “Bunge maalumu la katiba kipimo cha kuchaguliwa tena 2015” na makala nyingine katika Gazeti hili hili lenye kichwa cha habari “Bunge halina mamlaka ya kupigia kura rasimu ya wananchi” bali Mhe Mizengo Pinda ametoa ushauri huo baada ya kusoma alama za nyakati kwamba kuamua ibara na vifungu vya rasimu iliyotokana na maoni ya wananchi k wa kupigia kura ni kuwashushia hadhi hasa wabunge wa CCM kwa kuwa wao ndiyo wengi na kuwafanya wasichaguliwe tena kama chama katika chaguzi za Serikali ya mtaa na ule wa mwakani 2015.

    Ushauri wangu katika makala hizo mbili, ushauri ambao umeungwa mkono na Mh Mizengo Pinda utalinusuru bunge kama kupitisha kanuni kumeleta vurugu je wakati wa kupitisha ibara na vifungu vyenye ubishani kama watatumia kupiga kura itakuwaje? Jibu la swali hili ndilo litapelekea ushauri wangu na wa Mhe Pinda uzingatiwe.

     Katika ushauri wangu pamoja na maombi mengine niliwashauri, wajumbe wa bunge hili la katiba kuwa si tu  watakuwa wamefanya makosa makubwa kupigia kura maoni yaliyopo kwenye rasimu ya katiba iliyotokana na wananchi bali pia hawana mamlaka ya kufanya hivyo.  Nawakilazimisha kufanya hivyo si tu watakuwa  wamewapuuza watanzania bali pia kuwasaliti watanzania kwa kukataa maoni yao kwa kupiga kura ya hapana.

      Kitendo cha Waziri Mkuu Mizengo Pinda kuwaomba wajumbe wenzake wabunge la katiba kujadili na kupitisha ibara vifungu vyenye mabishano/mvutano mkubwa kwa kutumia jopo (roundtable) la watu wenye busara na uzalendo na nchi yao ndani ya bunge lenyewe si tu atalifanya bunge hili kuingia katika historia nzuri ya kuwaletea katiba yao iliyotokana na maoni yao.

     Ili nisiwe mwizi wa fadhila, aina hiyo ya pongezi niwamiminie, kiongozi wa kambi rasmi ya upinzani Mh Freeman Mbowe na Prof. Ibrahim Lipumba  kwa kuunga mkono kauli ya Waziri mkuu Mizengo Pinda kuwa mambo yenye mvutano/ubishani yajadiliwe kwa busara na kuamuliwa kwa pamoja na jopo (roundtable) la watu wenye si tu na busara bali pia wenye mapenzi na uzalendo na nchi yao ndani ya Bunge hilo la Katiba.

     Kauli hiyo ya Mhe Mizengo Pinda kama Mwenyekiti wa Bunge wa CCM ni dalili tosha kuwa inachukuliwa kama kauli ya wabunge wote wa CCM, kwa hiyo ninawapongeza wabunge wote wa CCM kuliona hilo, ambalo mimi nililiona mapema zaidi na nikalitolea ushauri mapema katika makala nilizozitaja hapo juu ingawa mimi nilipendekeza mambo hayo yaamuliwe na Majaji 11 kutoka nje ya bunge badala ya kupigiwa kura ya ²/₃ ya wabunge hilo la katiba.

       Kuamua mambo yatakayokuwa na ubishani/mvutano mkubwa kwa ushauri wa Waziri mkuu Mizengo Pinda ni kuonyesha wao wenyewe wanauwezo wa kufanya jambo hilo nililokuwa nimewashauri bila kupata watu nje ya bunge hilo kwa kuunda jopo ndani ya bunge.

     Aidha dalili za hicho alichokishauri Waziri mkuu Mizengo Pinda kitapata uhai baada ya Bunge hilo kupata mtu makini na mwenye uwezo mkubwa kuliongoza bunge hilo kama Mhe Samweli Sita.

    Kwa lugha nzuri unaweza kusema “kazi ya Mwenyekiti wa bunge inatakiwa kupata mtu siyo mtu amepata kazi ya kuwa Mwenyekiti wa bunge”

(Mwl. Anthony Gella).

      “Mimi bado napigia kelele utaratibu wa kufanyia maamuzi ibara na vifungu vilivyotokana na maoni ya wananchi baada ya wabunge kutofautiana kwa kupigia kura ya ndiyo na hapana badala ya kufanya marekebisho ibara hiyo ikaaje kwa manufaa ya watanzania na baadaye kutuletea sisi tupigie kura tena ya ndiyo au hapana, huku ni kuwasaliti watanzania” kanuni mlizipitisha za kupiga kura badala ya maridhiano hazijawatendea haki watanzania.

      Baada ya kauli hiyo ya Mhe Pinda ninawasihi wabunge wote wanatokana na Chama cha Mapinduzi (CCM) kuungana na Mwenyekiti wenu Mhe Pinda kwa busara kubwa alizozitoa kwa wajumbe wote wa bunge hilo maalumu la katiba, kufanya hivyo si tu  kujiongezea heshima mbele ya watanzania bali pia ni kumwingiza Rais  wetu Jakaya Kikwete kwenye historia nzuri ya kuwaletea watanzania katiba waitakayo na makundi yote ya watanzania.  Na kufanya kinyume na hilo ni kujinyima wenyewe historia nzuri na kumyima pia Rais Wetu aliyelianzisha suala hili kwa nia ya kuwaletea watanzania katiba yao waitakayo na baadaye waipate Tanzania waitakayo.

      “Mimi binafsi nafurahi ujumbe wangu si tu  umefika bali pia umefanyiwa kazi na Mhe Mizengo Pinda na naomba wajumbe wa bunge maalumu la katiba mfanyie kazi pia”.

     Nawatakia kila la kheri kuingia katika historia kama lilivyo bunge la kihistoria na kumwingiza pia Rais wetu katika historia.

Na Mwl. Anthony Thomas Gella

0656 907751

            agella72@yahoo.com