CHADEMA: CCM inavuruga katiba

MWENYEKITI wa Vijana wa Chama cha Demokrasia na Maendeleo (CHADEMA), John Heche, amesema kuwa chama cha siasa, taasisi, asasi yoyote ya kiraia kuweka msimamo wake kwenye hatua ya sasa ya mchakato wa katiba mpya ni jambo lisilokubalika kwa sababu linakwenda kinyume na maoni ya wananchi.

Amesema kuwa wakati wa vyama vya siasa au makundi mengine katika jamii kuwa na misimamo yake kwenye suala la katiba mpya ulishapita, ambapo kila chama au taasisi iliwasilisha maoni yake kwenye hatua ya awali mbele ya Tume ya Mabadiliko ya Katiba, chini ya Jaji Joseph Warioba.

Akizungumza katika maeneo mbalimbali ya Jimbo la Kalenga kwenye mikutano ya kampeni za uchaguzi mdogo jimboni humo, akimnadi mgombea wa CHADEMA, Grace Tendega, Heche aliwaambia wananchi kuwa kitendo cha CCM kuandika waraka, kikiweka msimamo wa chama hicho dhidi ya rasimu ya pili ya katiba mpya, ni dalili ya wazi kuwa hakina dhamira ya njema katika mchakato huo nyeti.

Tanzania Daima