Mbunge agonganisha kauli za mawaziri

Suzan Lyimo, Mbunge CHADEMA.

  Mbunge wa Viti Maalum (Chadema), Suzan Lyimo, ameibana serikali akiitaka ilielezea taifa kwanini mawaziri wametoa kauli mbili tofauti kuhusiana na upangaji wa matokeo ya kidato cha nne kwa kutumia mfumo mpya wa Fixed Grade Ranges, ambao unaelezwa kusababisha wanafunzi wengi kufeli. Lyimo aliibana serikali juzi jioni wakati Bunge lilipokaa kama kamati kupitia vifungu vya Bajeti ya Wizara ya Elimu na Mafunzo ya Ufundi kwa mwaka 2013/2014. Alisema Waziri wa Elimu na Mafunzo ya Ufundi, Dk. Shukuru Kawambwa, alitoa kauli inayotofautiana na Waziri wa Nchi Ofisi ya Waziri Mkuu (Sera, Uratibu na Bunge), William Lukuvi, kuhusiana na mfumo huo mpya.

         Alisema anataarifa ya kufanyika kwa kikao cha Baraza la Mawaziri Novemba 14 mwaka jana na Waziri  Dk. Kawambwa alihudhuria katika kikao hicho, ambapo suala la mfumo huo mpya kutumika kupanga matokeo lilizungumzwa. Alidai barua aliyonayo ni kuhusu utaratibu wa matumizi ya alama za maendeleo ya viwango vya ufaulu katika mitihani iliyoandikwa na Kamishna wa Elimu na pia ana barua nyingine ya Desemba 12 iliyoandikwa na Kaimu Katibu Mkuu wa Wizara hiyo ikielezea suala hilo. Alisema ingawa Dk. Kawambwa na Lukuvi walikuwa katika kikao cha  Baraza la Mawaziri wakati mfumo huo ukijadiliwa, lakini Lukuvi alipofika bungeni baada ya kikao hicho aliliambia Bunge kuwa wameamua kubadilisha matokeo hayo na sababu kubwa ni kwamba wadau hawakushirikishwa katika utaratibu huo mpya.

       “Kama Waziri wa Nchi ambaye ana-represent (anawakilisha)  mawazo ya Baraza la Mawaziri amekuja ndani ya Bunge lako tukufu akaeleza kilichojiri na kwanini serikali imeamua kubatilisha matokeo halafu akatoa sababu kubwa kwamba wadau hawakushirikishwa lakini Dk. Kawambwa akasema walishirikishwa” alisema.

Source: Sauwa S. ( June 2013).Mbunge agonganisha kauli za mawaziri. Dodoma. Retrieved from Ippmedia/ Nipashe