BAVICHA: Kongamano la vijana kujadili elimu

TAARIFA KWA VYOMBO VYA HABARI

BARAZA LA VIJANA CHADEMA WAANDAA KONGAMANO KUBWA LA ELIMU

KUTOKANA na kutambua kuwa moja ya matatizo makubwa yanayowakabili vijana wa Tanzania kwa muda mrefu sasa ni ukosefu wa elimu bora inayokidhi viwango vya kutoa taaluma na utaalam kwa ajili ya mahitaji halisi ya jamii yetu, Baraza la Vijana wa Chama cha Demokrasia na Maendeleo (BAVICHA) limeandaa kongamano kubwa la kujadili elimu na mustakabali wataifa la Tanzania litakalofanyika mjini Dodoma siku ya Jumapili, tarehe 9, 2013, Ukumbi wa Kilimani.

Kongamano hilo ambalo litawakutanisha wanafunzi wa shule za msingi, sekondari, vyuo vikuu, walimu pamoja na wahadhiri, litajadili hali ya elimu nchini na mstakabali wa nchi yetu kwa miaka 50 hadi 100 ijayo, likijikita katika kuchambua namna mfumo wa uendeshaji na usimamizi unavyosababisha kuporomoka kwa sekta hiyo nyeti na kisha kujadili njia mbadala za kusaidia kuondoka hapa tulipokwama kama taifa.

BAVICHA limeandaa kongamano hilo, wakati ambapo tayari viashiria vya matatizo makubwa katika mfumo wa elimu yetu nchini yameanza kuonekana wazi wazi kupitia matokeo mabovu ya vijana wanaohitimu ngazi mbalimbali za elimu nchini.

Aidha, kongamano hilo linafanyika wakati huu ambapo serikali ya CCM imeweza kuonesha pasi na shaka yoyote, kiwango cha hali ya juu cha kushindwa kusimamia na kuendesha sekta ya elimu ambayo ndiyo injini ya taifa lolote lile linalotaka kupigania ustawi na maendeleo ya watu wake, kwa vizazi na vizazi.

Pia BAVICHA inaandaa kongamano hili baada ya serikali kupitia bajeti ya Wizara ya Elimu na Mafunzo ya Ufundi, kushindwa kuonesha ufumbuzi wa matatizo yanayoikabili sekta ya elimu na badala yake imeendelea na ubabaishaji ambao umetufikisha hapa kwenye anguko na janga kubwa la kizazi cha leo na kesho kutokana na kuporomoka kwa elimu yetu.

Baada ya uchambuzi wa hoja zitakazoibuliwa wakati wa mjadala wa kongamano hilo, BAVICHA itawasilisha maoni yake kwa chama ikiwa ni sehemu ya mchango wa vijana wa Tanzania, kuboresha sera ya CHADEMA katika elimu.

Maoni hayo yatasaidia CHADEMA kuendelea kusimamia na kusukuma agenda hii muhimu ya elimu katika nchi hii, tukitambua kuwa chama kimeshaazimia kuifanya elimu kuwa ni kipaumbele namba moja, namba mbili, kati ya sera kuu tulizonazo kwa ajili ya mawazo mbadala kwa maendeleo ya taifa letu.

Imetolewa leo, Dar es salaam na;

Deogratias Munishi

Katibu Mkuu BAVICHA